قصيدة ( للشاعر /سلمان بن يحيى الحريصي )
ماني من اللي يخضع الراس للناس
أهون علي أموت والراس عالي
ماني من اللي يشرب الخمر بالكاس
ويعيش بين الخايفين الذلالي
كيفٍ يكيّف بك وهو شرب الأنجاس
وتحسبنه من طبوع الرجالِ
من كيف راسك صرت معدوم الإحساس
وتبيع عرضك.. وإنتبه ما تبالي
وكل يومٍ ضيّق الصدر منحاس
ومن باع ماي الوجه باع التوالي
ماني من اللي يعتذر ساعة الباس
ويهاب من سرْيا الوهن والليالي
أنا بدوي ولي قبيلة ولي ساس
أشب ناري فوق ذيك الجبالي
أقرّب الدلّه ونجرٍ ومحماس
والكهربه عندي القمر لي صفالي
وبعد المطر هبايب الجو نسناس
والبرق من بين السحاب الثقالي
جوٍّ يزوّد راعي العشق هوجاس
ويحتار ما بين المها والغزالي
وكل رجلٍ فيه للطيب مقياس
ولله على خلق الوفا والكمالي
أهدي تحياتي لكم فوق قرطاس
أشرح معانيها وأجاوب سؤالي
الخميس أكتوبر 15, 2009 3:50 am
